ನವದೆಹಲಿ, ಜನವರಿ 27 – ಮೂಲ ಕೊರೋನಾ ಸೋಂಕಿಗಿಂತ ಶೇಕಡ 70ರಷ್ಟು ವೇಗವಾಗಿ ಹರಡಬಲ್ಲ ಬ್ರಿಟನ್ ಮೂಲದ ಹೊಸ ರೂಪಾಂತರಿ ಸೋಂಕು ನಿವಾರಣೆಗೂ ಕೋವ್ಯಾಕ್ಸಿನ್ ಲಸಿಕೆ ರಾಮಬಾಣ, ಬಹಳ ಪರಿಣಾಮಕಾರಿ ಎಂದು ಲಸಿಕೆ ಉತ್ಪಾದನೆ ಕಂಪನಿ ಭಾರತ ಬಯೋಟೆಕ್ ಹೇಳಿಕೊಂಡಿದೆ.
ಹೊಸ ರೂಪಾಂತರಿ ಸೋಂಕಿನ ವಿರುದ್ಧವೂ ಲಸಿಕೆ ಬಹಳ ಪರಿಣಾಮಕಾರಿಯಾಗಿ ಕೆಲಸ ಮಾಡಲಿದ್ದು, ಇದು ವೈದ್ಯಕೀಯ ಪರೀಕ್ಷೆಯಿಂದ ದೃಡಪಟ್ಟಿದೆ. ಸೋಂಕು ಇನ್ನಷ್ಟು ವೇಗವಾಗಿ ರೂಪಾಂತರ ಹೊಂದುವುದನ್ನು ಲಸಿಕೆಯಿಂದ ತಪ್ಪಿಸಬಹುದಾಗಿದೆ ಎಂದು ಭಾರತ್ ಬಯೋಟೆಕ್ ಇಂದು ಟ್ವೀಟ್ ಮಾಡಿದೆ. ಈ ಕುರಿತು ನಡೆಸಿರುವ ಸಂಶೋಧನೆಯ ತುಣುಕಿನ ಕೊಂಡಿಯನ್ನು ಅದರೊಂದಿಗೆ ಹಂಚಿಕೊಳ್ಳಲಾಗಿದೆ.
ಇದುವರೆಗೂ ಭಾರತದಲ್ಲಿ 150 ಮಂದಿಯಲ್ಲಿ ಬ್ರಿಟನ್ ರೂಪಾಂತರಿ ಸೋಂಕು ಪತ್ತೆಯಾಗಿದೆ. ಸದ್ಯಕ್ಕೆ ಇರುವ ಲಸಿಕೆಗಳು ಈ ರೂಪಾಂತರ ಸೋಂಕಿನ ಮೇಲೆ ಪರಿಣಾಮಕಾರಿ ಹೌದೋ ಅಲ್ಲವೋ ಎಂಬ ಕುರಿತು ಚರ್ಚೆ ನಡೆದಿರುವ ಸಮಯದಲ್ಲೇ ಇದೀಗ ಭಾರತ ಬಯೋಟೆಕ್ ತಮ್ಮ ಲಸಿಕೆ ಇದಕ್ಕೂ ರಾಮಬಾಣ, ಪರಿಣಾಮಕಾರಿ ಎಂದೂ ಹೇಳಿಕೊಂಡಿದೆ.
