ಪಣಜಿ, ಆಗಸ್ಟ್ 3: ಗೋವಾದಲ್ಲಿ ಪ್ರವಾಸಿಗರಿಂದ ಉಂಟಾಗುವ ಅಸಮರ್ಪಕ ಚಟುವಟಿಕೆಗಳಿಗೆ ಕಡಿವಾಣ ಹಾಕಲು ರಾಜ್ಯ ಸರ್ಕಾರ ಹೊಸ ನಿಯಮಗಳನ್ನು ಜಾರಿಗೆ ತಂದಿದೆ. ಸಮುದ್ರ ತೀರಗಳು ಹಾಗೂ ಪ್ರವಾಸಿ ತಾಣಗಳಲ್ಲಿ 19 ವಿಧದ ಚಟುವಟಿಕೆಗಳನ್ನು 'ಸಾರ್ವಜನಿಕ ತೊಂದರೆ' ಎಂದು ಘೋಷಿಸಲಾಗಿದ್ದು, ತಪ್ಪಿತಸ್ಥರಿಗೆ ₹5 ಸಾವಿರದಿಂದ ₹1 ಲಕ್ಷದವರೆಗೆ ದಂಡ ವಿಧಿಸಲು ಅವಕಾಶ ಕಲ್ಪಿಸಲಾಗಿದೆ.
ಪ್ರವಾಸೋದ್ಯಮ ನಿರ್ದೇಶಕ ಕೇದಾರ ನಾಯ್ಕ ಅಧಿಸೂಚನೆ ಹೊರಡಿಸಿದ್ದು, ದೂರು ಬಂದ ನಂತರ ಮಾತ್ರವಲ್ಲದೆ, ನಿಯಮ ಉಲ್ಲಂಘನೆ ಕಂಡುಬಂದ ತಕ್ಷಣವೇ ಪೊಲೀಸರು ಹಾಗೂ ಪ್ರವಾಸೋದ್ಯಮ ಇಲಾಖೆ ಅಧಿಕಾರಿಗಳು ಕ್ರಮ ಕೈಗೊಳ್ಳಬಹುದಾಗಿದೆ.
ಹೊಸ ನಿಯಮಗಳ ಪ್ರಕಾರ ಅನುಮತಿ ಇಲ್ಲದೆ ಸಮುದ್ರ ತೀರದಲ್ಲಿ ಪಾರ್ಟಿ ಅಥವಾ ಕಾರ್ಯಕ್ರಮ ಆಯೋಜಿಸುವುದು, ನೋಂದಣಿಯಾಗದ ಮಾರ್ಗದರ್ಶಕರು, ಮಸಾಜ್ ಮಾಡುವವರು ಅಥವಾ ಬೀದಿ ವ್ಯಾಪಾರಿಗಳ ಸೇವೆ ಪಡೆಯುವುದು, ಅಧಿಕೃತ ಅನುಮತಿ ಇಲ್ಲದ ಕೇಂದ್ರಗಳಿಂದ ಕ್ರೂಸ್ ಅಥವಾ ಜಲಕ್ರೀಡೆ ಟಿಕೆಟ್ ಖರೀದಿಸುವುದು ನಿಷೇಧಿಸಲಾಗಿದೆ.
ಇದಲ್ಲದೆ, ನಿಗದಿತ ಪ್ರದೇಶಗಳ ಹೊರತಾಗಿ ಮದ್ಯಪಾನ ಮಾಡುವುದು, ಗಾಜಿನ ಬಾಟಲಿಗಳನ್ನು ಒಡೆದು ಎಸೆಯುವುದು, ಅನುಮತಿಸದ ಸ್ಥಳಗಳಲ್ಲಿ ಅಡುಗೆ ಮಾಡುವುದು, ಕಸ ಎಸೆಯುವುದು, ಅನುಮತಿ ಇಲ್ಲದ ನದಿ ಕ್ರೂಸ್ ಅಥವಾ ಜಲಕ್ರೀಡೆ ನಡೆಸುವುದು, ಸಮುದ್ರ ತೀರದಲ್ಲಿ ವಾಹನ ಚಲಾಯಿಸುವುದು ಹಾಗೂ ತುರ್ತು ಸೇವೆ, ಜೀವರಕ್ಷಕ ಸಿಬ್ಬಂದಿ ಅಥವಾ ಸ್ವಚ್ಛತಾ ವಾಹನಗಳ ಸಂಚಾರಕ್ಕೆ ಅಡ್ಡಿಪಡಿಸುವುದೂ ದಂಡನೀಯ ಅಪರಾಧವಾಗಲಿದೆ.
ಸಮುದ್ರ ತೀರ ಅಥವಾ ಅದರ ಸಮೀಪ ತ್ಯಾಜ್ಯ, ಒಳಚರಂಡಿ ನೀರು, ರಾಸಾಯನಿಕ ಅಥವಾ ತೈಲ ತ್ಯಾಜ್ಯ ಸುರಿಯುವ ವ್ಯಕ್ತಿಗಳು ಅಥವಾ ಸಂಸ್ಥೆಗಳ ವಿರುದ್ಧವೂ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ.
ಈ ನಿಯಮಗಳನ್ನು ಉಲ್ಲಂಘಿಸಿದವರಿಗೆ ₹5 ಸಾವಿರದಿಂದ ₹1 ಲಕ್ಷದವರೆಗೆ ದಂಡ ವಿಧಿಸಬಹುದಾಗಿದ್ದು, ಅಗತ್ಯವಿದ್ದರೆ ಭಾರತೀಯ ನ್ಯಾಯ ಸಂಹಿತೆ–2023ರ ಸೆಕ್ಷನ್ 223ರ ಅಡಿಯಲ್ಲಿ ಕಾನೂನು ಕ್ರಮವನ್ನೂ ಕೈಗೊಳ್ಳಬಹುದಾಗಿದೆ.
