ಪೆಟ್ರೋಲ್, ಡೀಸೆಲ್ ಬೆಲೆ ಏರಿಕೆ: ಇಂಧನ ಬೆಲೆ ಇಳಿದಾಗ ಲಕ್ಷಾಂತರ ಕೋಟಿ ಲಾಭ ಮಾಡಿಕೊಂಡ ಕಂಪನಿಗಳಿಂದ ಈಗ ಜನರ ಮೇಲೆ ಮತ್ತಷ್ಟು ಹೊರೆ

ಬೆಂಗಳೂರು, ಮೇ 15 : ದೇಶದಲ್ಲಿ ಪೆಟ್ರೋಲ್‌ ಹಾಗೂ ಡೀಸೆಲ್‌ ದರವನ್ನು ಶುಕ್ರವಾರ ಲೀಟರ್‌ಗೆ ಸುಮಾರು ₹3ರಷ್ಟು ಹೆಚ್ಚಿಸಲಾಗಿದೆ.

ದರ ಏರಿಕೆಯ ಬಳಿಕ ಹೊಸದಿಲ್ಲಿಯಲ್ಲಿ ಪೆಟ್ರೋಲ್‌ ದರ ಲೀಟರ್‌ಗೆ ₹97.77ಕ್ಕೆ ಹಾಗೂ ಡೀಸೆಲ್‌ ದರ ₹90.67ಕ್ಕೆ ಏರಿಕೆಯಾಗಿದೆ. ಪಶ್ಚಿಮ ಏಷ್ಯಾ ಸಂಘರ್ಷ ಮತ್ತಷ್ಟು ತೀವ್ರವಾದರೆ ಮುಂದಿನ ದಿನಗಳಲ್ಲಿ ಇಂಧನ ದರ ಇನ್ನಷ್ಟು ಏರಿಕೆಯಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಪಶ್ಚಿಮ ಏಷ್ಯಾದಲ್ಲಿನ ಉದ್ವಿಗ್ನ ಪರಿಸ್ಥಿತಿ ಹಾಗೂ ಜಾಗತಿಕ ಮಟ್ಟದಲ್ಲಿ ಕಚ್ಚಾ ತೈಲ ದರ ಏರಿಕೆಯ ಪರಿಣಾಮವಾಗಿ ತೈಲ ಕಂಪನಿಗಳು ಈ ನಿರ್ಧಾರ ಕೈಗೊಂಡಿವೆ ಎಂದು ಹೇಳಿವೆಯಾದರೂ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಬ್ಯಾರೆಲ್‌ಗೆ $30ಕ್ಕಿಂತಲೂ ಕಡಿಮೆ ಮಟ್ಟಕ್ಕೆ ಇಳಿದಿದ್ದ ಸಂದರ್ಭದಲ್ಲಿಯೂ ದೇಶದ ಜನರಿಗೆ ಅದರ ಲಾಭ ಸಿಗಲಿಲ್ಲ ಎಂಬ ಟೀಕೆಗಳು ಕೇಳಿಬಂದಿವೆ. ಆಗ ತೈಲ ಕಂಪನಿಗಳು ಇಂಧನ ದರ ಕಡಿತ ಮಾಡದೆ ಯಾವುದೇ ಪ್ರಯೋಜನ ನೀಡಲಿಲ್ಲ. ಇದೀಗ ಕಚ್ಚಾ ತೈಲ ದರ ಏರಿಕೆಯಾದ ತಕ್ಷಣ ಅದರ ಸಂಪೂರ್ಣ ಹೊರೆ ಜನಸಾಮಾನ್ಯರ ಮೇಲೇ ಹಾಕಲಾಗುತ್ತಿದೆ ಎಂಬ ಆಕ್ರೋಶವೂ ವ್ಯಕ್ತವಾಗುತ್ತಿದೆ.

ಇಂಧನ ದರ ಏರಿಕೆಯ ಪರಿಣಾಮ ಕೇವಲ ವಾಹನಗಳಿಗಷ್ಟೇ ಸೀಮಿತವಾಗದೆ, ಆಹಾರ ಪದಾರ್ಥಗಳ ಬೆಲೆ, ಸಾರಿಗೆ ವೆಚ್ಚ, ಆನ್‌ಲೈನ್‌ ವಿತರಣಾ ಸೇವೆಗಳು ಹಾಗೂ ಮನೆಯ ಮಾಸಿಕ ಖರ್ಚಿನ ಮೇಲೂ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ಅರ್ಥಶಾಸ್ತ್ರಜ್ಞರು ತಿಳಿಸಿದ್ದಾರೆ.

ಡೀಸೆಲ್‌ ದರ ಏರಿಕೆಯಿಂದ ಬಸ್‌, ಲಾರಿ ಹಾಗೂ ಸರಕು ಸಾಗಣೆ ವೆಚ್ಚ ಹೆಚ್ಚಾಗಲಿದ್ದು, ಇದರ ಪರಿಣಾಮ ಆಟೋ, ಕ್ಯಾಬ್‌ ಹಾಗೂ ವಿವಿಧ ಸಾರಿಗೆ ಸೇವೆಗಳ ದರಗಳ ಮೇಲೂ ಬೀಳಲಿದೆ. ಪೆಟ್ರೋಲ್‌ ದರ ಏರಿಕೆಯಿಂದ ಕಾರು ಹಾಗೂ ಬೈಕ್‌ ಬಳಸುವವರ ದೈನಂದಿನ ಪ್ರಯಾಣ ವೆಚ್ಚವೂ ಹೆಚ್ಚಾಗಲಿದೆ.

ಭಾರತದಲ್ಲಿ ಆಹಾರ ಪೂರೈಕೆಯ ಬಹುಪಾಲು ರಸ್ತೆ ಸಾರಿಗೆಯ ಮೂಲಕ ನಡೆಯುವುದರಿಂದ ಡೀಸೆಲ್‌ ದರ ಏರಿಕೆಯ ಪರಿಣಾಮ ಆಹಾರ ವಸ್ತುಗಳ ಮೇಲೂ ಬೀಳಲಿದೆ. ತರಕಾರಿ, ಹಣ್ಣು, ಹಾಲು, ಧಾನ್ಯಗಳು ಹಾಗೂ ಪ್ಯಾಕೇಜ್‌ ಉತ್ಪನ್ನಗಳ ಸಾಗಣೆ ವೆಚ್ಚ ಹೆಚ್ಚಾಗುವುದರಿಂದ ಅಂತಿಮವಾಗಿ ಗ್ರಾಹಕರೇ ಹೆಚ್ಚುವರಿ ಹೊರೆ ಹೊರುವ ಪರಿಸ್ಥಿತಿ ನಿರ್ಮಾಣವಾಗಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇತ್ತೀಚೆಗೆ ಹಾಲಿನ ದರವೂ ಲೀಟರ್‌ಗೆ ₹2ರಷ್ಟು ಏರಿಕೆಯಾಗಿದೆ. ಇಂಧನ ದರ ಏರಿಕೆ ದೀರ್ಘಕಾಲ ಮುಂದುವರಿದರೆ ಆಹಾರ ಹಣದುಬ್ಬರವೂ ಹೆಚ್ಚಾಗುವ ಆತಂಕ ವ್ಯಕ್ತವಾಗಿದೆ.

ಇಂಧನ ದರ ಏರಿಕೆಯ ಪರಿಣಾಮ ಆನ್‌ಲೈನ್‌ ವಿತರಣಾ ಸಂಸ್ಥೆಗಳು ಹಾಗೂ ಇ-ವಾಣಿಜ್ಯ ಸೇವೆಗಳ ಮೇಲೂ ಬೀಳಲಿದ್ದು, ವಿತರಣಾ ಶುಲ್ಕ ಹೆಚ್ಚಳ, ರಿಯಾಯಿತಿ ಕಡಿತ ಹಾಗೂ ಕನಿಷ್ಠ ಖರೀದಿ ಮೌಲ್ಯ ಏರಿಕೆ ಸಾಧ್ಯತೆ ಇದೆ ಎಂದು ವರದಿಗಳು ತಿಳಿಸಿವೆ.

ಗ್ರಾಮೀಣ ಪ್ರದೇಶಗಳಲ್ಲಿಯೂ ಡೀಸೆಲ್‌ ದರ ಏರಿಕೆಯ ಪರಿಣಾಮ ಗಂಭೀರವಾಗುವ ಸಾಧ್ಯತೆ ಇದೆ. ರೈತರು ಟ್ರ್ಯಾಕ್ಟರ್‌, ನೀರಾವರಿ ಪಂಪ್‌ ಹಾಗೂ ಸಾರಿಗೆ ವಾಹನಗಳಿಗೆ ಡೀಸೆಲ್‌ ಅವಲಂಬಿಸಿರುವುದರಿಂದ ಕೃಷಿ ವೆಚ್ಚ ಹೆಚ್ಚಾಗಿ ಆಹಾರ ಉತ್ಪಾದನಾ ದರಗಳ ಮೇಲೂ ಒತ್ತಡ ಬೀಳಬಹುದು ಎಂದು ತಜ್ಞರು ಹೇಳಿದ್ದಾರೆ.

ಇದೇ ವೇಳೆ ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ಸಿಎನ್‌ಜಿ ದರವನ್ನೂ ಪ್ರತಿ ಕೆಜಿಗೆ ₹2ರಷ್ಟು ಹೆಚ್ಚಿಸಿವೆ. ಹೊಸದಿಲ್ಲಿಯಲ್ಲಿ ಸಿಎನ್‌ಜಿ ದರ ಕೆಜಿಗೆ ₹77.09ರಿಂದ ₹79.09ಕ್ಕೆ ಏರಿಕೆಯಾಗಿದೆ.