ಬ್ಯಾಂಕಾಕ, ಆಗಸ್ಟ್ 6: ದಕ್ಷಿಣ ಥೈಲ್ಯಾಂಡ್ನಲ್ಲಿ ನಡೆಯುತ್ತಿದ್ದ 'ಗೋಲೋಕ್ ಎಫ್ಎ ಕಪ್' ಫುಟ್ಬಾಲ್ ಟೂರ್ನಿಯ ಪಂದ್ಯದ ವೇಳೆ ಮೈದಾನಕ್ಕೆ ಸಿಡಿಲು ಬಡಿದು 24 ವರ್ಷದ ಆಟಗಾರ ಸಾವನ್ನಪ್ಪಿದ ದಾರುಣ ಘಟನೆ ನಡೆದಿದೆ. ಮೃತರನ್ನು ಸ್ಯಾಮ್ಕೋಲ್ಟ್ಸ್ ತಂಡದ ವಿಂಗರ್ ಸೋಫ್ವಾನ್ ಅವಾಯ್ ಎಂದು ಗುರುತಿಸಲಾಗಿದೆ.
https://twitter.com/visegrad24/status/2084954248505171984
ಧಾರಾಕಾರ ಮಳೆಯ ನಡುವೆಯೂ ಪಂದ್ಯ ಮುಂದುವರಿದಿದ್ದಾಗ ಏಕಾಏಕಿ ಪ್ರಬಲ ಸಿಡಿಲು ಮೈದಾನಕ್ಕೆ ಬಡಿದಿದೆ. ಸಿಡಿಲಿನ ಹೊಡೆತಕ್ಕೆ ಸೋಫ್ವಾನ್ ಅವಾಯ್ ಮೈದಾನದಲ್ಲೇ ಕುಸಿದು ಬಿದ್ದಿದ್ದು, ಸಹ ಆಟಗಾರರು ಹಾಗೂ ವೈದ್ಯಕೀಯ ಸಿಬ್ಬಂದಿ ತಕ್ಷಣವೇ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಅವರು ಮೃತಪಟ್ಟಿದ್ದಾರೆ. ಘಟನೆಯ ದೃಶ್ಯ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಥೈಲ್ಯಾಂಡ್ ಹಾಗೂ ಮಲೇಷ್ಯಾದ ಪ್ರಾದೇಶಿಕ ತಂಡಗಳು ಭಾಗವಹಿಸಿದ್ದ ಟೂರ್ನಿಯಲ್ಲಿ ಸ್ಯಾಮ್ಕೋಲ್ಟ್ಸ್ ಮತ್ತು ಅಬು ಎಕ್ಸ್ ನಾಂಗ್ ಸಿರಿನ್ ತಂಡಗಳ ನಡುವೆ ಪಂದ್ಯ ನಡೆಯುತ್ತಿತ್ತು. ಹವಾಮಾನ ಪ್ರತಿಕೂಲವಾಗಿದ್ದರೂ ಪಂದ್ಯವನ್ನು ಸ್ಥಗಿತಗೊಳಿಸದ ಸಂಘಟಕರ ನಿರ್ಧಾರಕ್ಕೆ ಸಾರ್ವಜನಿಕರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಥೈಲ್ಯಾಂಡ್ನಲ್ಲಿ ಸಿಡಿಲು ಬಡಿದು ಸಾವಿನ ಘಟನೆಗಳು ಆಗಾಗ ವರದಿಯಾಗುತ್ತಿವೆ. ಅಲ್ಲಿನ ರೋಗ ನಿಯಂತ್ರಣ ಇಲಾಖೆಯ ಅಂಕಿಅಂಶಗಳ ಪ್ರಕಾರ, 2020ರಿಂದ 2024ರ ಅವಧಿಯಲ್ಲಿ ದೇಶದಲ್ಲಿ ಕನಿಷ್ಠ 283 ಮಂದಿ ಸಿಡಿಲು ಬಡಿದು ಮೃತಪಟ್ಟಿದ್ದಾರೆ.
