ಸನಾ, ಜೂ. 8 : ಯೆಮೆನ್ನ ಹೌತಿ ಬಂಡುಕೋರರು ಇಸ್ರೇಲ್ ವಿರುದ್ಧ ನಡೆಸಿದ ದಾಳಿಯನ್ನು ದೃಢಪಡಿಸಿದ್ದು, ಆಕ್ರಮಿತ ಜಾಫಾ ಪ್ರದೇಶದಲ್ಲಿರುವ ಇಸ್ರೇಲ್ನ ಸೂಕ್ಷ್ಮ ನೆಲೆಗಳನ್ನು ಗುರಿಯಾಗಿಸಿಕೊಂಡು ಕಾರ್ಯಾಚರಣೆ ನಡೆಸಿರುವುದಾಗಿ ತಿಳಿಸಿದ್ದಾರೆ ಎಂದು ವರದಿಯಾಗಿದೆ.
ಟೆಲಿಗ್ರಾಮ್ನಲ್ಲಿ ಪ್ರಕಟಿಸಿದ ಹೇಳಿಕೆಯಲ್ಲಿ, ಕೆಂಪು ಸಮುದ್ರದಲ್ಲಿ ಇಸ್ರೇಲ್ಗೆ ಸಂಬಂಧಿಸಿದ ಸಮುದ್ರ ಸಂಚಾರದ ಮೇಲೆ ಸಂಪೂರ್ಣ ನಿಷೇಧ ಹೇರಿರುವುದಾಗಿ ಹೌತಿಗಳು ಘೋಷಿಸಿದ್ದಾರೆ. ಅಲ್ಲದೆ, ತಮ್ಮ ವಿರುದ್ಧ ಯಾವುದೇ ಆಕ್ರಮಣಕಾರಿ ಕ್ರಮ ಕೈಗೊಳ್ಳಲಾದರೆ ಅದಕ್ಕೆ ತಕ್ಕ ಪ್ರತಿಕ್ರಿಯೆ ನೀಡುವುದಾಗಿ ಎಚ್ಚರಿಕೆ ನೀಡಿದ್ದಾರೆ.
ನಮ್ಮ ಜನರ ಮೇಲೂ ಹಾಗೂ ಫೆಲೆಸ್ತೀನ್, ಗಾಝಾ, ಇರಾನ್, ಲೆಬನಾನ್ ಮತ್ತು ಇರಾಕ್ನಲ್ಲಿರುವ ಪ್ರತಿರೋಧಿ ಸಂಘಟನೆಗಳ ಮೇಲೂ ಹೇರಲಾಗಿರುವ ಅನ್ಯಾಯದ ಮುತ್ತಿಗೆಯನ್ನು ನಾವು ಮೌನವಾಗಿ ಸಹಿಸುವುದಿಲ್ಲ ಎಂದು ಹೌತಿಗಳ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಹೆಚ್ಚುತ್ತಿರುವ ಬೆನ್ನಲ್ಲೇ ಹೌತಿಗಳ ಈ ಘೋಷಣೆ ಪ್ರಾದೇಶಿಕ ಭದ್ರತಾ ಪರಿಸ್ಥಿತಿಯ ಬಗ್ಗೆ ಮತ್ತಷ್ಟು ಆತಂಕ ಮೂಡಿಸಿದೆ.
