ರಾಮದುರ್ಗ : ಜೀಪ್ (ಕ್ರೂಜರ್ ) ಮತ್ತು ಎರಡು ಬೈಕ್ ಗಳ ಮಧ್ಯೆ ಮುಖಾಮುಖಿ ಢಿಕ್ಕಿ ಸಂಭವಿಸಿ ಇಬ್ಬರು ಯುವಕರು ಸ್ಥಳದಲ್ಲಿ ಮೃತಪಟ್ಟು ಮತ್ತಿಬ್ಬರಿಗೆ ಗಂಭೀರ ಗಾಯಗಳಾಗಿರುವ ಘಟನೆ ಬೆಳಗಾವಿ ಜಿಲ್ಲೆ ರಾಮದುರ್ಗ ತಾಲೂಕಿನ ಕಡ್ಲಿಕೊಪ್ಪ ಗ್ರಾಮದ ಹತ್ತಿರ ನಡೆದಿದೆ.
ರಾಮದುರ್ಗ ಪಟ್ಟಣದ ಭಾಗ್ಯನಗರದ ನಿವಾಸಿ 25 ವಯಸ್ಸಿನ ಮಹಾನಿಂಗ ನಂಜಪ್ಪ ಅಚಮಟ್ಟಿ ಹಾಗೂ ಮಡ್ಡಿಗಲ್ಲಿಯ 26 ವಯಸ್ಸಿನ ರಫೀಕ ಚಲವಾದಿ ಮೃತಪತ್ತಿದ್ದಾರೆ.
ಅಪಘಾತದಲ್ಲಿ ಗಾಯಗೊಂಡ ಪಟ್ಟಣದ ಆಶ್ರಯ ಪ್ಲಾಟನ ನಿವಾಸಿ ಉನ್ನಿಸ ಮಹಮ್ಮದ ಪಟೇಲ ಅವರನ್ನು ಬಾಗಲಕೋಟ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಮತ್ತು ಭಾಗ್ಯನಗರದ ನಿವಾಸಿ ಮಾರುತಿ ಬಂಡಿವಡ್ಡರ ಸ್ಥಳೀಯ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಿಸಲಾಗಿದೆ.
ಎರಡು ಬೈಕ್ ಗಳಲ್ಲಿ ನಾಲ್ಕು ಜನರು ಸವದತ್ತಿ ತಾಲೂಕಿನ ಶಿರಸಂಗಿ ಗ್ರಾಮದಲ್ಲಿ ಕಟ್ಟಡ ನಿರ್ಮಾಣ ಕೆಲಸವನ್ನು ಮುಗಿಸಿಕೊಂಡು ರಾಮದುರ್ಗದ ಕಡೆಗೆ ಬರುವಾಗ ರಾಮದುರ್ಗ ಕಡೆಯಿಂದ ಶಿರಸಂಗಿ ಕಡೆಗೆ ಹೊರಟಿದ್ದ ಜೀಪ್ ಮಧ್ಯೆ ಡಿಕ್ಕಿಯಾಗಿದೆ.
ಅಪಘಾತ ಕುರಿತು ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
