ಬೆಳಗಾವಿ, ಅ. 5 : (ಸಮದರ್ಶಿ ಸುದ್ದಿ) - ಅಂತರರಾಷ್ಟ್ರೀಯ ಮಾನವ ಹಕ್ಕುಗಳ ಆಯೋಗ (ಐಎಚ್‌ಆರ್‌ಸಿ) ಬೆಳಗಾವಿ ಜಿಲ್ಲಾ ಮಂಡಳಿಯ ಅಧ್ಯಕ್ಷರಾಗಿ ಮಾನವ ಹಕ್ಕುಗಳ ಕಾರ್ಯಕರ್ತ ಅಬ್ದುಲ್ ಅಜೀಜ ಎಚ್. ಶೇಖ ಅವರನ್ನು ನೇಮಕ ಮಾಡಲಾಗಿದೆ.
ಐಎಚ್‌ಆರ್‌ಸಿ ಫೌಂಡೇಶನ್ ಬೋರ್ಡ್ ಈ ನೇಮಕ ಮಾಡಿದ್ದು, ಸಂಸ್ಥೆಯ ಅಧ್ಯಕ್ಷ ಡಾ. ಕಮ್ರಾನ ಖಾನ್ ಅವರು ಅ. 3ರಂದು ಅಧಿಕೃತ ನೇಮಕಾತಿ ಪತ್ರ ಹೊರಡಿಸಿದ್ದಾರೆ. ಅ. 3ರಿಂದ ಮುಂದಿನ ಆದೇಶದವರೆಗೆ ಶೇಖ ಅವರು ಬೆಳಗಾವಿ ಜಿಲ್ಲಾ ಮಂಡಳಿಯ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ನೇಮಕಾತಿ ಪತ್ರದಲ್ಲಿ ತಿಳಿಸಲಾಗಿದೆ.
ಮಾನವ ಹಕ್ಕುಗಳ ಕ್ಷೇತ್ರದಲ್ಲಿ ಶೇಖ ಅವರು ಸಲ್ಲಿಸುತ್ತಿರುವ ಸೇವೆ, ಯುವಜನರ ಪ್ರೋತ್ಸಾಹ ಮತ್ತು ಸಬಲೀಕರಣ ಹಾಗೂ ಸಾಮಾಜಿಕ ಮತ್ತು ಸಮುದಾಯ ಸೇವೆಗಳಲ್ಲಿ ಅವರ ಕಾರ್ಯವನ್ನು ಪರಿಗಣಿಸಿ ಈ ಜವಾಬ್ದಾರಿ ನೀಡಲಾಗಿದೆ ಎಂದು ಆಯೋಗ ತಿಳಿಸಿದೆ.bಮಾನವಕುಲದ ಒಳಿತು ಮತ್ತು ಶಾಂತಿಗಾಗಿ ಯುವ ನಾಯಕನಾಗಿ ಅವರು ನಡೆಸುತ್ತಿರುವ ಕಾರ್ಯಗಳನ್ನು ಶ್ಲಾಘಿಸಿರುವ ಆಯೋಗ, ತನ್ನ ಧ್ಯೇಯ ಮತ್ತು ಉದ್ದೇಶಗಳಿಗೆ ಅನುಗುಣವಾಗಿ ಬೆಳಗಾವಿ ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುವಂತೆ ಸೂಚಿಸಿದೆ.
