ರಿಯಾದ್, ಅ. 21: ಮುಸ್ಲಿಮರ ಪವಿತ್ರ ಧಾರ್ಮಿಕ ಕೇಂದ್ರವಾದ ಮೆಕ್ಕಾದ ಮಸೀದಿಯೊಂದರಲ್ಲಿ ಅಸಭ್ಯವಾಗಿ ವರ್ತಿಸಿದ ಆರೋಪದ ಮೇಲೆ ಬಾಂಗ್ಲಾದೇಶದ ಇಬ್ಬರಿಗೆ ಸೌದಿ ಅರೇಬಿಯಾ ಮರಣದಂಡನೆ ಜಾರಿಗೊಳಿಸಿರುವುದು ವಿವಾದಕ್ಕೆ ಕಾರಣವಾಗಿದೆ. ಈ ಕ್ರಮದ ವಿರುದ್ಧ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಆಕ್ರೋಶ ವ್ಯಕ್ತವಾಗಿದ್ದು, ತನ್ನ ಪ್ರಜೆಗಳಿಗೆ ಮರಣದಂಡನೆ ವಿಧಿಸುವ ಮೊದಲು ಮಾಹಿತಿ ನೀಡದಿರುವುದಕ್ಕೆ ಬಾಂಗ್ಲಾದೇಶ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ.
ಮರಣದಂಡನೆಗೆ ಒಳಗಾದವರನ್ನು ನಜ್ರುಲ್ ಇಸ್ಲಾಂ ಅಬ್ದುಲ್ ಬಶೀರ್ ಮತ್ತು ಸಿರಿ ಅಖ್ತರ್ ಎಂದು ಗುರುತಿಸಲಾಗಿದೆ. ಇಸ್ಲಾಮಿಕ್ ಕಾನೂನಿನ 'ತಅಝೀರ್' (Ta'zir) ವ್ಯವಸ್ಥೆಯಡಿ ನ್ಯಾಯಾಲಯವು ಅವರಿಗೆ ಮರಣದಂಡನೆ ವಿಧಿಸಿತ್ತು ಎಂದು ಸೌದಿ ಅರೇಬಿಯಾದ ಆಂತರಿಕ ಸಚಿವಾಲಯ ತಿಳಿಸಿದೆ.
ಆದರೆ, ಆರೋಪಿಗಳು ಮಸೀದಿಯಲ್ಲಿ ನಿಖರವಾಗಿ ಯಾವ ಕೃತ್ಯ ಎಸಗಿದ್ದರು, ಘಟನೆ ಯಾವ ಮಸೀದಿಯಲ್ಲಿ ನಡೆದಿತ್ತು ಹಾಗೂ ಅವರನ್ನು ಯಾವಾಗ ಬಂಧಿಸಲಾಗಿತ್ತು ಎಂಬ ವಿವರಗಳನ್ನು ಸಚಿವಾಲಯ ಬಹಿರಂಗಪಡಿಸಿಲ್ಲ. ಕೆಲವು ಮಾಧ್ಯಮಗಳು ಇಬ್ಬರನ್ನು ದಂಪತಿ ಎಂದು ಉಲ್ಲೇಖಿಸಿದ್ದರೂ, ಅವರು ವಿವಾಹಿತರಾಗಿದ್ದರೇ ಎಂಬುದು ದೃಢಪಟ್ಟಿಲ್ಲ. ಮಸೀದಿಯಲ್ಲಿ ಪರಸ್ಪರ ಮುತ್ತಿಟ್ಟಿದ್ದಕ್ಕೆ ಶಿಕ್ಷೆ ವಿಧಿಸಲಾಗಿದೆ ಎಂಬ ಹೇಳಿಕೆಗೂ ಅಧಿಕೃತ ದೃಢೀಕರಣ ಲಭ್ಯವಾಗಿಲ್ಲ.
ಮಸೀದಿಯ ಪಾವಿತ್ರ್ಯಕ್ಕೆ ಧಕ್ಕೆ ತಂದ ಆರೋಪ
ಮಸೀದಿಯ ಆವರಣದಲ್ಲಿ ಅಸಭ್ಯವಾಗಿ ವರ್ತಿಸಿದ ಆರೋಪದ ಹಿನ್ನೆಲೆಯಲ್ಲಿ ಭದ್ರತಾ ಅಧಿಕಾರಿಗಳು ಇಬ್ಬರನ್ನು ಬಂಧಿಸಿದ್ದರು. ತನಿಖೆಯ ಬಳಿಕ ಪ್ರಕರಣವನ್ನು ನ್ಯಾಯಾಲಯಕ್ಕೆ ಒಪ್ಪಿಸಲಾಗಿತ್ತು ಎಂದು ಸೌದಿ ಆಂತರಿಕ ಸಚಿವಾಲಯ ವಿವರಿಸಿದೆ.
ಕೃತ್ಯದ ಗಂಭೀರತೆ, ಮಸೀದಿಯ ಪಾವಿತ್ರ್ಯ ಹಾಗೂ ಘಟನೆ ನಡೆದ ಸಂದರ್ಭಗಳನ್ನು ಪರಿಗಣಿಸಿ ನ್ಯಾಯಾಲಯವು ಆರೋಪಿಗಳನ್ನು ದೋಷಿಗಳೆಂದು ಘೋಷಿಸಿ ಮರಣದಂಡನೆ ವಿಧಿಸಿದೆ ಎಂದು ಸಚಿವಾಲಯ ಸಮರ್ಥಿಸಿಕೊಂಡಿದೆ.
ಆದರೆ, ಯಾವ ನಿರ್ದಿಷ್ಟ ಕಾನೂನು ವಿಧಿಯಡಿ ಶಿಕ್ಷೆ ವಿಧಿಸಲಾಯಿತು ಮತ್ತು ಆರೋಪಿಗಳಿಗೆ ವಕೀಲರ ನೆರವು ದೊರೆತಿತ್ತೇ ಎಂಬ ಪ್ರಶ್ನೆಗಳಿಗೆ ಸ್ಪಷ್ಟ ಉತ್ತರ ನೀಡಿಲ್ಲ. ಮಸೀದಿಗಳ ಪಾವಿತ್ರ್ಯಕ್ಕೆ ಧಕ್ಕೆ ತರುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಸೌದಿ ಸರ್ಕಾರ ಎಚ್ಚರಿಸಿದೆ.
ಬಾಂಗ್ಲಾದೇಶದಿಂದ ವಿವರಣೆ ಕೇಳಿ ಪತ್ರ
ತನ್ನ ಇಬ್ಬರು ಪ್ರಜೆಗಳಿಗೆ ಮರಣದಂಡನೆ ಜಾರಿಗೊಳಿಸುವ ಮೊದಲು ಯಾವುದೇ ಮಾಹಿತಿ ನೀಡದಿರುವ ಸೌದಿ ಅರೇಬಿಯಾದ ಕ್ರಮಕ್ಕೆ ಬಾಂಗ್ಲಾದೇಶ ಸರ್ಕಾರ ಅಸಮಾಧಾನ ವ್ಯಕ್ತಪಡಿಸಿದೆ.
ಮರಣದಂಡನೆ ವಿಧಿಸಲು ಕಾರಣವಾದ ಆರೋಪಗಳು, ನ್ಯಾಯಾಂಗ ವಿಚಾರಣೆ ಹಾಗೂ ಶಿಕ್ಷೆ ಜಾರಿಗೊಳಿಸಿದ ಸಂದರ್ಭಗಳ ಕುರಿತು ಸಂಪೂರ್ಣ ವಿವರ ನೀಡುವಂತೆ ಸೌದಿ ಸರ್ಕಾರಕ್ಕೆ ಪತ್ರ ಬರೆದಿದೆ.
ಜೆಡ್ಡಾದಲ್ಲಿರುವ ಬಾಂಗ್ಲಾದೇಶದ ಕಾನ್ಸುಲೇಟ್ ಜನರಲ್ ಕಚೇರಿಗೂ ಮರಣದಂಡನೆ ಕುರಿತು ಮುಂಚಿತವಾಗಿ ಮಾಹಿತಿ ನೀಡಿರಲಿಲ್ಲ ಎಂದು ಬಾಂಗ್ಲಾದೇಶದ 'ದಿ ಡೈಲಿ ಸ್ಟಾರ್' ವರದಿ ಮಾಡಿದೆ.
ಏನಿದು ತಅಝೀರ್ ಕಾನೂನು?
ಇಸ್ಲಾಮಿಕ್ ಅಪರಾಧ ಕಾನೂನಿನಲ್ಲಿ ಶಿಕ್ಷೆಗಳನ್ನು ಸಾಮಾನ್ಯವಾಗಿ ಹದ್ದ್, ಕಿಸಾಸ್ ಮತ್ತು ತಅಝೀರ್ ಎಂಬ ಮೂರು ಪ್ರಮುಖ ವರ್ಗಗಳಾಗಿ ವಿಂಗಡಿಸಲಾಗುತ್ತದೆ.
ಹದ್ದ್ ವ್ಯವಸ್ಥೆಯಲ್ಲಿ ಕೆಲವು ನಿರ್ದಿಷ್ಟ ಅಪರಾಧಗಳಿಗೆ ಧಾರ್ಮಿಕ ಕಾನೂನಿನ ಪ್ರಕಾರ ಶಿಕ್ಷೆಗಳನ್ನು ನಿಗದಿಪಡಿಸಲಾಗಿರುತ್ತದೆ. ಕಿಸಾಸ್ ವ್ಯವಸ್ಥೆಯು ಮುಖ್ಯವಾಗಿ ಕೊಲೆ ಮತ್ತು ದೈಹಿಕ ಹಾನಿಯಂತಹ ಅಪರಾಧಗಳಿಗೆ ಪ್ರತೀಕಾರಾತ್ಮಕ ನ್ಯಾಯದ ತತ್ವವನ್ನು ಒಳಗೊಂಡಿದೆ.
ಆದರೆ, ತಅಝೀರ್ ವ್ಯವಸ್ಥೆಯಲ್ಲಿ ಅಪರಾಧದ ಸ್ವರೂಪ, ಗಂಭೀರತೆ ಹಾಗೂ ಸಂದರ್ಭಗಳನ್ನು ಪರಿಗಣಿಸಿ ಕಾನೂನಿನ ಮಿತಿಯೊಳಗೆ ಶಿಕ್ಷೆ ನಿರ್ಧರಿಸಲು ನ್ಯಾಯಾಧೀಶರಿಗೆ ವಿವೇಚನಾಧಿಕಾರ ನೀಡಲಾಗುತ್ತದೆ.
ಸೌದಿ ಅರೇಬಿಯಾದ ನ್ಯಾಯಾಂಗ ವ್ಯವಸ್ಥೆಯಲ್ಲಿ ಈ ಅಧಿಕಾರದ ಬಳಕೆ ಕುರಿತು ಮಾನವ ಹಕ್ಕುಗಳ ಸಂಘಟನೆಗಳು ಹಲವು ವರ್ಷಗಳಿಂದ ಪ್ರಶ್ನೆಗಳನ್ನು ಎತ್ತುತ್ತಿವೆ.
ಮಾನವ ಹಕ್ಕುಗಳ ಸಂಘಟನೆಯಾದ ಹ್ಯೂಮನ್ ರೈಟ್ಸ್ ವಾಚ್ 2008ರಲ್ಲಿ ಪ್ರಕಟಿಸಿದ್ದ ವರದಿಯಲ್ಲಿ, ಸೌದಿ ಅರೇಬಿಯಾದ ಬಹುತೇಕ ಅಪರಾಧ ಪ್ರಕರಣಗಳು ತಅಝೀರ್ ವರ್ಗಕ್ಕೆ ಸೇರಿದ್ದವು ಎಂದು ತಿಳಿಸಿತ್ತು. ಅಪರಾಧಗಳ ವ್ಯಾಖ್ಯಾನ ಹಾಗೂ ಶಿಕ್ಷೆ ನಿರ್ಧಾರದಲ್ಲಿ ನ್ಯಾಯಾಧೀಶರಿಗೆ ವ್ಯಾಪಕ ವಿವೇಚನಾಧಿಕಾರ ಇರುವುದರ ಕುರಿತು ಸಂಘಟನೆ ಕಳವಳ ವ್ಯಕ್ತಪಡಿಸಿತ್ತು.
ಈ ಪ್ರಕರಣದಲ್ಲಿ ಆರೋಪಿಗಳ ವಿರುದ್ಧದ ನಿಖರ ಸಾಕ್ಷ್ಯಗಳು, ವಿಚಾರಣೆಯ ವಿವರಗಳು ಹಾಗೂ ಕಾನೂನು ನೆರವಿನ ಕುರಿತು ಮಾಹಿತಿ ಬಹಿರಂಗಪಡಿಸದಿರುವುದು ನ್ಯಾಯಾಂಗ ಪ್ರಕ್ರಿಯೆಯ ಪಾರದರ್ಶಕತೆಯ ಬಗ್ಗೆ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಅದರಲ್ಲೂ ವಿದೇಶಿ ಪ್ರಜೆಗಳಿಗೆ ಮರಣದಂಡನೆ ಜಾರಿಗೊಳಿಸುವ ಮೊದಲು ಅವರ ದೇಶದ ರಾಜತಾಂತ್ರಿಕ ಅಧಿಕಾರಿಗಳಿಗೆ ಮಾಹಿತಿ ನೀಡದಿರುವುದು ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಚರ್ಚೆಗೆ ಕಾರಣವಾಗಿದೆ. ಪ್ರಕರಣದ ಸಂಪೂರ್ಣ ವಿವರಗಳನ್ನು ಸೌದಿ ಅರೇಬಿಯಾ ಬಹಿರಂಗಪಡಿಸಬೇಕೆಂದು ಬಾಂಗ್ಲಾದೇಶ ಆಗ್ರಹಿಸಿದೆ.
